Thomae Naogeorgi carmen ad emptorem

Est ratio in mundo magnum et venerabile donum

      Maius et est verbi notitia alta sacri.

Est celebris magnusque omnique colendus honore,

      Res mundi summa qui ratione docet.

5

Maior et hoc longe bene qui coelestia novit

      Omnibus et docte pandere dia studet.

Quantos esse putas horum qui praediti utroque

      Luxerunt aliis clima per omne viris?

Omnipotens sane multos humana docentes

10

      Praeconesque sui praestitit eloquii.

Non modo praesenti verbo linguaque diserta

      Sed scriptis etiam parte in utraque libris.

Quolibet ut pacto caecis serviret ubique

      Alteri et alterius ferret opem studium.

15

Qui fuerint autem, quos ediderintque libellos

      Et brevibus vereque indicat iste liber.

Hos tu conquiras nec spernas optima dona,

      Nullus erit prorsus qui utilitate vacet.

Si nequeas autem cunctos acquirere libros

20

      Hoc tibi solus erit Bibliotheca liber.

Lectori S.C.

Legisse libros omnium qui scripserint

Laboriosum est longiusque saeculo.

Paucos bonosque deligendos censeo.

Tu iudicato qui boni sint aut mali.

5

Omnes tibi bonos malosque protulit

Gesnerus in sua libraria libros

Quae continet plures crumena quam capit

Theruntius Phokeriana. Sed modus

Phokerianae erit pecuniae: libro

10

Huic nullus est modus futurus, ni libros

Scribentium cesssabit insanus labor.

Nam nescias Gesnerianas utrum opes

Augere plures has velint iam maximas

An de Pokeriano acervo carpere.